Dilnozaning yulduzli kuni: bekobodlik shoira Zulfiya mukofotiga sazovor bo‘ldi

“Yangi Bekobod” gazetasining “E’tirof” ruknida bekobodlik yosh shoira Dilnoza Pirimqulova haqida maqola chop etildi. Muallif – O‘zbekiston Yozuvchilar uyushmasi a’zosi Nurali Jalil.

Dilnoza “O‘zmetkombinat” korxonasining quyuv-prokatlash majmuasida ishlaydi va kombinatdagi shijoatli yoshlar orasida ajralib turadi. Prezidentimizning kombinat faollari bilan uchrashuvida u yoshlar nomidan so‘zga chiqib, davlatimiz rahbari bilan bevosita muloqot qildi.

Dilnozaning aytishicha, uchrashuvdan uch kun oldin kombinat rahbariyati unga yoshlar nomidan so‘zga chiqishini aytgan. Avvaliga hayajonlangan, ammo Prezidentning sodda va samimiy muloqotini ko‘rib, so‘zga chiqqanida xuddi otasi bilan gaplashayotgandek his qilgan. Uchrashuvda Prezident Dilnozaning Zulfiya nomidagi mukofotga sazovor bo‘lganini e’lon qildi.

Uchrashuvning ertasi kuni O‘zbekiston Oliy Majlisi Senati raisi Tanzila Norboyeva va Toshkent viloyati hokimi Zoir Mirzayev ishtirokida Dilnoza Pirimqulovaga Zulfiya nomidagi Davlat mukofoti tantanali ravishda topshirildi.

Bekobodning metallurglar oilasidan chiqqan shoira qizni elga tanitgan asar uning “Metallurglar” she’ri bo‘ldi. She’rda metallurglar mehnati va yangilanayotgan Vatan poydevoriga qo‘shilayotgan hissa tarannum etilgan.

Maqola to‘liq holda gazetaning 2026-yil 29-iyuldagi 28–29-sonida chop etilgan.