Bekobodda Mustaqillikning 35 yilligi va tumanning 100 yilligi keng nishonlandi

Mustaqilligimizning 35 yilligi va Bekobod tumani tashkil topganining 100 yilligi tumanda katta tantana bilan nishonlandi. Bayram kuni ertalabdan kechgacha turli tadbirlarga boy bo‘ldi.

Yangi binolar va bog‘cha Bunyodkor va Terakzor mahallalarida mahalla fuqarolar yig‘inlarining yangi binolari foydalanishga topshirildi. Terakzor mahallasida zamonaviy maktabgacha ta’lim tashkiloti ham ochildi. So‘nggi bir yarim yilda tumanda 24 ta mahalla binosi yangidan qurildi, 32 ta yangi bog‘cha barpo etildi. Bolalarni bog‘cha bilan qamrab olish darajasi 2025-yil yanvaridagi 72 foizdan 85 foizga yetdi.

Fotoko‘rgazma va ijodkorlar bilan uchrashuv Zafar shaharchasidagi Madaniyat markazida taniqli fototasvirchi Sultonboy Dehqonovning “Yangi Bekobod – yangi manzillar” nomli shaxsiy fotoko‘rgazmasi ochildi. Unda muallifning 45 ta ijodiy ishi namoyish etildi. Ko‘rgazmada tuman hokimi Z. Nizomiddinov hamda O‘zbekiston Badiiy akademiyasi raisi, O‘zbekiston xalq rassomi Akmal Nur ishtirok etdi.

Shuningdek, tumanda ijod qilayotgan shoir va yozuvchilar bilan uchrashuv bo‘lib o‘tdi. Unda O‘zbekiston Yozuvchilar uyushmasi raisi, Xalq shoiri, senator Sirojiddin Sayyid, O‘zbekiston xalq yozuvchisi Muhammad Ali va boshqa ijodkorlar qatnashdi. Besh nafar bekobodlik ijodkorga O‘zbekiston Yozuvchilar uyushmasi a’zoligi guvohnomalari topshirildi.

Kechki tantana Kechqurun Zafar shaharchasidagi Markaziy o‘yingohda “Yagona Vatan, yagona xalq bo‘lib, yangi hayot va kelajak yaratamiz” shiori ostida bayram dasturi namoyish etildi. Tantanaga qo‘shni tumanlar, Sirdaryo viloyati, poytaxt va qo‘shni Tojikistondan ham mehmonlar keldi.

Dasturda yosh sportchilar va chempionlarning ko‘rgazmali chiqishlari hamda xalq artistlarining konserti bo‘ldi. Sun’iy intellekt yordamida tayyorlangan, Bekobod va Zafar shaharchasining besh yildan keyingi ko‘rinishini aks ettirgan namoyish tomoshabinlarda katta qiziqish uyg‘otdi. Bayram mushakbozlik bilan yakunlandi.

Raqamlarda – 2025-yilda byudjet hisobidan 370 milliard so‘mlik qurilish va obodonlashtirish ishlari bajarildi, 2026-yilda bu maqsadlarga 450 milliard so‘mdan ortiq mablag‘ yo‘naltirildi; – 2025-yilda tumanda ishsizlik darajasi 5,9 foizdan 4,4 foizga, kambag‘allik darajasi 9,8 foizdan 3,8 foizga tushdi; – Markaziy o‘yingohda qiymati 15 milliard so‘m bo‘lgan zamonaviy boks zali qurilishi yakunlanmoqda.