Beshinchi Toshkent xalqaro investitsiya forumi: yangi marralar va yangi sheriklik

O’zbekiston Respublikasi Prezidenti Shavkat Mirziyoyev 17-iyun kuni beshinchi Toshkent xalqaro investitsiya forumining yalpi majlisida ishtirok etib, nutq so’zladi.

Tadbirda Albaniya Prezidenti Bayram Begay, Rossiya Hukumati Raisi Mixail Mishustin, Ozarbayjon, Belarus, Qozog’iston, Qirg’iziston va Tojikiston hukumat rahbarlari qatnashdi. Shuningdek, Yangi taraqqiyot banki rahbari Dilma Rusef, xalqaro moliya institutlari, xorijiy banklar, global korporatsiyalar va investitsiya fondlari vakillari ham ishtirok etdi. 100 dan ortiq mamlakatdan 10 mingdan ziyod delegat yig’ilgani forumning xalqaro nufuzi oshib borayotganini ko’rsatdi.

Joriy yilgi forum “Investitsiyaviy barqarorlik: yangi marralar va yangi sheriklik” mavzusiga bag’ishlandi. Davlatimiz rahbari O’zbekiston teng huquqli va o’zaro manfaatli sheriklik uchun doimo ochiq ekanini ta’kidladi.

Nutqda keltirilgan asosiy ko’rsatkichlar:

o’tgan yili iqtisodiyot 7,7 foizga o’sdi, joriy yilda yalpi ichki mahsulot 180 milliard dollardan oshishi kutilmoqda; jalb qilingan investitsiyalar hajmi 43 milliard dollarga yetdi, xalqaro zaxiralar 70 milliard dollardan oshdi; so’nggi yillarda 150 milliard dollardan ziyod xorijiy investitsiya jalb qilindi, shundan 123 milliardi oxirgi besh yilga to’g’ri keladi; “Iqtisodiy erkinlik indeksi”da mamlakat ilk bor “iqtisodiyoti mo’tadil erkin” davlatlar qatoridan joy oldi.

Prezident investitsiyaviy hamkorlikni chuqurlashtirish bo’yicha oltita ustuvor yo’nalishni belgiladi. Ular qatoriga investorlar uchun huquqiy kafolatlarni kuchaytirish, Toshkent xalqaro moliya markazini rivojlantirish va kapital bozorini kengaytirish kiradi. Shuningdek, sanoat, “yashil” energetika va sun’iy intellekt sohalarida hamkorlik, transport-logistika bog’liqligini oshirish hamda hududlarda investitsiyaviy hamkorlikni yangi bosqichga ko’tarish ham shu yo’nalishlarga kiradi.

Yaqin istiqboldagi rejalar:

energetika balansida qayta tiklanuvchi energiya ulushini 54 foizga yetkazish; yiliga 20 million yo’lovchiga xizmat ko’rsatadigan yangi Toshkent xalqaro aeroportini qurish; 2040-yilgacha uy-joylar sonini 2 karra oshirish; yiliga 15–20 million xorijiy sayyohni qabul qilish; qishloq xo’jaligi eksportini 3,5 milliard dollardan 10 milliard dollarga yetkazish.

Nutq yakunida Prezident Markaziy Osiyo va Kavkaz investitsiya kengashlarining mintaqaviy alyansini tashkil etishni taklif qildi. U xorijiy sarmoyadorlar uchun Yangi O’zbekistonning eshiklari hamisha ochiq ekanini aytdi.